Ya ye rematando atro berano, un berano que remeraremos por haber sobrebibiu a crisis economicas, ixuqueras que dixaban sin augua bels ríos, una expo suposadament de l’augua que teneba menos rigor que un cartel feito por un nino de prescolar (pero con muitos millons por meyo). Tamién hemos sobrebibiu a l’apocalipsis y a o caos que una maquiabelica maquina clamada LHC iba a sembrar en l’uniberso y que iba a creyar un forau negro que iba a abala-se a Tierra como qui mincha una fraga.
Tamién remeraremos iste berano por atras cosas como a crema d’os monts de Zuera, unos monts asabelo polius con rutas senderistas y especies bechetals que en pocos puestos se gosan beyer. Totz años ye o mesmo, cuan pareix que ye l’añada con menos cremas, bi ha un GIF (gran incendio forestal) que crema o 90% d’o total, l’añada zaguera estió en Torre de las Arcas, con a trista remeranza d’a muerte d’una Achent forestal y ista añada, Zuera con cuasi 3000Ha.
Son muitas as armiellas d’a cadena que s’encarga d’o suyo amortamiento: bichilans, emisoristas, retens, APN’s (achents d’a proteuzión d’a naturaleza), elicopteros, idroabións, autobombas, boluntarios, etc… Manimenos cuan un meyo se fa eco d’a notizia mai no s’ascuita garra d’istas presonas pero prou que se’n fan d’os militars qui i son ius a “aduyar”. De seguro si fetz remeranza d’o que se dizió y escribió sobre Zuera, remeraretz a la menestra Chacón salutando a os militars de turno. ¿Y a
os APN’s, retens etc etc que tamién yeran fendo o suyo treballo?……..no, ixos a muyir fardachos.En istos moments podemos comparar opinións muit dibersas, como as que un periodico aragones amostró: Un señor deziba que se yera malfurriando muitos diners en pagar a chent ta amortar incendios puesto que no bi ha que 2 ó 3 a l’añada y que mientres no fan cosa(desinformazión total) Manimenos una señora deziba que si se sapeba que ixe mont gosa cremar-se una begada cada 15 añadas, como que no i feba un “reten de guardia” ta amortar-lo (no prexino que pasaría si se chuntarsen istos 2 siñors con opinión tan dispars) Siga como siga o comentario, tot ye ta fer mal.
Atro exemplo estió fa bellas semanas, una crema en os monts de Baltorres, yo mismo, que treballo de bichilant, debié abisar d’o inzendio. Tot estió en un moment, os meyos i plegón ascape y tot quedó en una estreta. Manimenos a o diya prosimo en os meyos dizioron que tot se salbó grazias a un motorista que beyó a crema y clamó ascape a o 112 y que mesmo se mobilizón os militars d’o serbizio d’emerchenzias…………t’os meyos no bi abió ni bichilants, ni retens, ni na de na, nomás os melitars y un motorista intrepido…
Tot podría quedar-se asinas, como si no estasenos que pantasmas, pero no, tot pareix un complot contra os “forestals” puesto que encara que no les ne agradixen o bien que fan, si que les culpan d’os delitos d’atros. Fa una añada totz os meyos afirmón que un Achent forestal muit intelichent tenió a brilant ideya de meter fuego a un mont ta que l’enamplasen o contrato. ¡¡Agora sí qu’en charran!! Pero bi eba una cosa que no me cuadraba, os achents forestals son funzionarios y por o tanto tienen contrato fixo aiga o no aiga más o menos treballo. Por supuesto, l’autor d’ista canallada no estió pas un achent forestal, estió un ombre que treballaba como peón forestal, no pas como achent forestal. Pero o mal ya yera feito, y asinas se ha feito que a chent pensase que os Achents forestals estasen piromanos y que os buenezicos d’os militars eban de ir ascape a amortar o fuego………
Escribo isto ta prebar de dinnificar una mica o treballo de totz os que fan posible a preserbazión d’os nuestros monts encara que os meyos se miren d’estriboquiar l’opinión publica.
6 comentarios:
Bueno, te devuelvo la visita a mi blog. He hecho un gran esfuerzo para leer tu entrada ehh jeje.
La verdad es que este verano que ya hoy dejamos atrás se las trae...
Eso sí, subrayo el esfuerzo de todos y cada uno de los agentes forestales que trabajan en nuestro país en la prevención de incendios forestales durante el estío.
Saludos!!
Iste ha sito ta yo ro pior brano de toz. Ya remata, menos mal!. Me fa enfualgo de leyer-te mozé, contina asinas, fablando de forestals e selbas.
Bien, pareix que somos pasatos la campanya sin guaires fuegos grands -menos el de Zuera- e poquetz chicotz, ahora a esperar que se pase la ixuquera e plebe, encara que -ya fa anyos que el digo- cal privar las cremas d'hivierno (e ansinas tendrinos más meses de troballo, ¿que no?).
Buenas Javi, pues sí, este veranico aún ha sido movido, porque ha habido muchos incendios pero pequeños, de todas formas, ha habido peores veranos. Cuidate, nos vemos.
Amelia, mersi por dentrar en o blog, a yo tamién me fa goyo de leyer os buestros comentarios, sobre tot ixos que me animan a continar enta debán. En berdat, ta yo, o pior berano estió fa 3 añadas, con os inzendios de Guadalajara, La Tranquera, etc etc. Pero iste berano tamién ha teniu o suyo, con Zuera ya esenos teniu prou ta toda l'añada.
Felquera, ¿Cómo ba tot en tierras alteras? ¿que cal pribar as cremas d'ibierno? No sé no sé, As cremas son muit importants ya que si no ¿como nos esferíamos de tot, d'as ramas, d'os restos de poda, etc? ¿Lebando-lo tot a un puesto como se fan con os berdederos? Ixo estaría muit caro. O problema ye que cal conzienziar a os agricultors y a toda a chent en cheneral de que cal fer as cremas en unas condizións determinadas tomando as precauzións debidas, no solo con ir t'as ofizinas d'os forestals y pidiendo una autorizazión de crema bi ha prou. Y en iste tema te aseguro que a chent encara no ye conzienziada, y ixo que ye por o suyo bien. Un saludo.
No mocet, me referibe a que las cremas (de verano, per aquí s'emplega crema como `incendio´) se privan d'hivierno limpiando el mont e fendo es treballos que cal fer (cortafuegos e, pro que sí, cremas controlatas).
De totas trazas i hai custions bien curiosas, fa poco charrando con un amigo me contó que una vez yera cremando broza ¡¡rodiato de nieu!! le llegó el seprona e el quereban joder.
Sincusa Felquera, no entendiba bien o que m'ebas quiesto dizir. Sí, tiens toda razón. L'ibierno puestar que siga a millor epoca ta fer totz os treballos de limpieza. No puede estar que nomás bels 5 u en atros casos 3 meses, se mire de limpiar os monts y a o mesmo tiempo d'estar alerta a las cremas. En puestos como en Guadalajara muitos d'os retens treballan d'ibierno y de berano nomás fan que echerzizio fisico de maitins y de tardis fan prauticas y simulacros ta estar paraus por si bi ha garra urchenzia.
Y prou que isto creyaría más treballos!!!
Jejeje, cremar broza rodiau de nieu...."beyer ta creyer", ombre, suposo que l'omenet en cuestión lo fazió de buena boluntat. Yo tamién sé de un espabilau que no se le ocurrió atra cosa que cremar unas ramas de vid en un bertedero y meter fuego a tot o bertedero y meyo mont
Publicar un comentario