viernes, 18 de abril de 2008

Zentenars d'animals mueren afogaus cada añada en una canal en Palenzia


Iste maitín como totz os diyas pillo o 20menutos en ir t'a clase. De cabo ta cuan bi ha bella notizia que truca o ficazio como una que he trobada iste maitín. 300 cuerzos y gran cantidat d'atros animals como chebalíns, lopos, etc mueren afogaus en una canal que Iberdrola poseye en o norte de Palenzia. A imachen que apareix en o cobalto d'a notizia lo diz tot; una uzena de cuerzos muertos que plegan de quitar d'a canal ficaus en un contenedor de basuera.

Pareix que ixa canal ye un puesto an os animals gosan ir a beber sin saber que ye una trampa mortal ta els. Ye rodiada d'una clena prou baixa alabetz os animals no troban garra problema ta blincar-la. O problema ye que ta beber l'augua cal baixar una ripa muit pingada, l'animal caye en l'augua, y no puede tornar a puyar por a ripa debiu a l'altaria, por o que tien una cruel angunia ya que en prebar-ne se raden as garras y mueren cansos.

Iberdrola amilloró as clenas dando-les más altaria, pero pareix que con ixo no bi'n ha prou y zentenars d'animals continan afogando-se-ie.


De casos como iste bi'n ha por totz os puestos. En o mío lugar raro ye o mes en que no mueren 2 güeitres eleutrocutaus ya que as torretas eleutricas no poseyen os sistemas que se amenistan ta que as abes no s'eleutrocuten. A yo mesmo me ha pertocau de ficar-los en una bolsa de basuera y lebar-los a os albeitars ta que les faigan a necropsia. ¿Y sabetz que se fa ta saluzionar-lo? Ni zarrapita ni pon. Se fa una entimadura a ERZ que la bosa sin garra problema ya que ta ista empresa ye más barato pagar l'entimadura que no meter os sistemas antieleutrocuzión.

A la fin tot se resume con diners. O barato ye bueno, o caro no'n ye. A bida en sí no importa


Por zierto, ya que charro d'iste afer tos dixo atra notizia sobre unos desalmaus que les cuacaba maltratar a mixins y dimpués en feban fotos. Manimenos pertenixeban a un grupo politico y mesmo uno s'eba presentau a las eleuzións municipals en Talabera d'a reina. Se suposa que istas presonas han de representar-nos u gubernar-nos.
Sin parolas...


1 comentario:

felquera dijo...

Per Sobrarbe tamién gosa pasar ixo. E ixo que i hai buena cosa de quilometros de canals tapatas con zemento, pero con tot e con ixo més d'una vez he visto bel corzo afocato en la presa de Pineta. Recuerdo que abe anyos es de San Marzal consiguioren que les tapasen u metesen un baran·nato per la canal que pasa cerca d'ixe caserío perque se les heba afocato bel·la vaca.
De totas trazas ixo d'es corzos ye curioso, perque per el que dicen es güelos d'antes més no'n i heba garra, e aora se'n vei mutos. Diz que dezaga d'el corzo vien el lupo, ya veremos se ixo ye verdat.